Еуропарламент өкілі Ресейге қарсы санкцияны күшейтуді сұрады

Еуропа халық партиясының төрағасы Манфред Вебер жаңа санкциялар бойынша  ресейлік олигархтардың қаражаты бұғатталып, Ресейдің SWIFT банк жүйесінен шеттетілуі мүмкін екенін жеткізді.

Еуропа парламентіндегі жетекші партия төрағасы Мәскеудің арандатуға барып жатқанын айтады.

Манфред Вебер Funke медиа тобына берген сұхбатында «Украина шығысындағы жанжал ушығып кетсе немесе колонияда жатқан оппозиционер Алексей Навальныйдың халі нашарласа Ресейге қарсы санкцияларды күшейту керек», деп мәлімдеді.  

Бұл Ресей газын Балтық теңізі арқылы Германияға жеткізетін «Солтүстік ағыс-2»  газ құбырының құрылысын қиындатуы ықтимал.

Bloomberg агенттігі бұған дейін Вашингтонның Ресей президенті Владимир Путиннің айналасындағы адамдарға санкция салу қарастыратындығын хабарлаған болатын. Бұқаралық ақпарат құралдарының жазуынша, АҚШ билігі  бірқатар Ресей дипломатын қайтаруы да мүмкін.