Еуропарламент депутаты Батыстың Украинаға ядролық қару беру құқығы туралы айтты

Еуропарламент депутаты Радослав Сикорский Батыстың Украинаға ядролық қару беруге құқығы бар екенін мәлімдеді.

Польшаның бұрынғы сыртқы істер министрі, Еуропарламент депутаты Радослав Сикорски Батыс елдері өз тәуелсіздігін қорғау үшін Украинаны ядролық қарумен қамтамасыз ете алады деп хабарлады.

Ол Будапешт меморандумының ережелеріне тоқтала келе, оған сәйкес Украина қауіпсіздік кепілдігінің орнына ядролық қарудан бас тартқанын алға тартты. Оның пікірінше, Ресей құжатта бекітілген міндеттемелерді бұзған.

— 1994 жылы Будапешт меморандумына қол қойылғаннан кейін Украина өзінің ядролық әлеуетінен бас тартты. Бүгінде ресейліктер де, кейбіреулер де бұл кепілдік емес деп айтады, бірақ бәрі сол кезде Украинаның КСРО кезінен бері қалыптасқан шекарада тәуелсіз ел болатынын түсінді, - деді Сикорский мырза Espresso TV эфирінде.

— Бірақ Ресей осы Будапешт меморандумын бұзғандықтан, мен Батыс ретінде біздің Украинаға ядролық оқтұмсық беруге құқығымыз бар деп ойлаймын. Бұл оның өз тәуелсіздігін қорғай алуы үшін қажет,- деп қосты ол.

Украина президенті Владимир Зеленский 19 ақпанда Мюнхен қауіпсіздік конференциясында сөйлеген сөзінде Украина ядролық емес статустан бас тартады деп қорқытып, Будапешт меморандумы аясындағы келісімге бастамашылық етті.