Еуропада ковид-құжат енгізу қолға алынып жатыр

Еуропада бірқатар мемлекет адамдардың коронавирусқа қарсы вакцина салдырғаны жазылған электрондық паспорт жасауға кірісіп кетті.

Бірнеше апта бұрын осындай құжатты Швеция, Дания енгізетінін айтты, оған енді Венгрия қосылып отыр. Венгрия мұндай құжатты  коронавирусқа қарсы екпенің 2 дозасын да алған және  аурудан  емделіп шыққан азаматтарға бермек. Антиденеге тест тапсырған тұрғындардың да осындай құжат алуға құқығы болады. Егер адам үйінде емделіп жазылған болса, құжатқа ПТР-тест нәтижесі енгізіледі. Кәрі құрылық үкіметі бұл індетті бақылаудың бірден бір жолы деп отыр.

 «Үкімет пен бизнес қауымдастығы «Корона» деп аталатын цифрлық паспорт жасау туралы келісімге келді. Бастамамыздың алғашқы нәтижесін осы айда көреміз. Вакцина салдырған азамат жайлы ақпарат арнайы сайтта жазылады. Кейінірек ол цифрлы төлқұжат түрінде қолданылады. Еуроодақ та Грекия бастамасымен осындай электрондық ортақ құжат енгізуге келісті. Ұйымға мүше елдер әзірге екпені салдырғаны жайлы цифрлық ақпаратты медициналық мақсатта пайдаланады. Бірақ кейін одақ аймағына ену үшін осындай құжат көрсету талап етілуі мүмкін», -дейді Дания қаржы министрі Мортен Боедсков.

Әлемде екпе алғаны жөніндегі цифрлық төлқұжат енгізуге қатысты әлі ортақ шешім жоқ. Бірақ әлемдік тәжрибеде кей екпеге қатысты осындай құжат қолданылып келе жатқанына ондаған жыл болды. Сондықтан келешекте адамдар саяхатқа тағы бір электрондық құжатпен шығуы әбден мүмкін.