Еуропа жаңа туристік маусымға дайын емес, ковид-құжат мәселе тудыруда

Еуроодақ елдері ковидке қарсы екпе  төлқұжаттарын үйлестіру мәселесін келісе алмай отыр. Олар COVID-19-бен ауырған адамдар мен екпе алғандарға  арналған  бірыңғай сертификаттарды  енгізу мен реттеуде  бір мәмілеге келе алмауда.  

Бұл жағдайдың туристік маусымның басталуына кері әсер ететіндігі сөзсіз. Одақ ретінде нақты шешім шығарылмағандықтан, әр ел мәселені өздігінен шешуге мәжбүр, деп хабарлайды  tourdom.ru сайты.

Қазір Еуропалық комиссия саяхатшылардың денсаулығы туралы барлық ақпаратты тіркеуге мүмкіндік беретін бірыңғай цифрлық платформаны құру жұмыстарын қарастыруда. Бұл жұмыс 3-4 ай созылуы мүмкін. Себебі тек жүйені дамыту процесі ғана емес, сертификаттарды заңды рәсімдеуге байланысты да мәселелер бар. Сондықтан туындаған  қиындықтарды шешу уақыт талап етеді. 

Экономикасы туризмге тәуелді елдер ковид-төлқұжат енгізілгенін қолдайды. Алайда, ЕО-ның бірнеше елі, соның ішінде Бельгия мен Франция ковид-төлқұжатын енгізуге қарсы.

Ал ЕК басшысы Урсула фон дер Ляйен комиссия мүшелері бұл мәселені  жан-жақты қарастыратындығын  мәлімдеді. Ол мұндай құжатты айналымға енгізу медициналық қажеттілік  екендігін  айтты.