Еуропа Одағы Израильді Газадағы мектепке шабуыл жасағаны үшін айыптады

Еуроодақтың Сыртқы істер және қауіпсіздік саясаты жөніндегі жоғарғы өкілі Жозеп Боррел Газадағы Әл-Табиин мектебіне Израиль армиясының шабуылы нәтижесінде кемінде жүз адамның қаза тапқанына наразылық білдірді.

Ол соңғы апталарда кемінде 10 мектептің нысанаға алынғанын атап өтті және бұл әрекетті ақтауға болмайтынын айтты.

Боррелл сонымен қатар Газада қақтығыс басталғаннан бері 40 мыңнан астам палестиналықтардың қаза тапқанын еске салды.

«Атысты тоқтату бейбіт тұрғындарды өлтіруді тоқтатудың және тұтқындардың босатылуын қамтамасыз етудің жалғыз жолы», - деді ЕО өкілі.

2024 жылдың 10 тамызында Израильдің Газа қаласындағы мектепке жасаған соққысы салдарынан 100 адамның қаза тапқаны белгілі болды. Шабуыл таң намазы кезінде болған. Ғимаратқа сол кезде әуе шабуылдарынан жасырынған газалықтар тығылған.