Еуропа кеңесінің басшысы Тоқаевқа хабарласты

Мемлекет басшысы Еуропалық Кеңестің президенті Антонио Костамен телефон арқылы сөйлесті, деп хабарлайды Orda.kz.

Ақорданың мәліметінше, әңгімелесу барысында Қазақстан мен Еуропа Одағы арасындағы байланыстарды нығайтудың өзекті мәселелері мен перспективасы талқыланды.  Мемлекет басшысы Еуропа Одағымен, соның ішінде Кеңейтілген серіктестік және ынтымақтастық туралы келісім аясындағы қарым-қатынастардың даму қарқынына оң баға берді. Сондай-ақ сауда, инвестиция, энергетика, көлік-логистика және цифрлық трансформация салаларындағы байланыстарды тереңдету мен орнықты дамудың маңызын атап өтті. 

Тараптар екі жақты және өңірлік күн тәртібінің барлық бағыты бойынша диалог пен өзара ықпалдастықты ілгерілетуге алдағы уақытта да дайын екенін растады және мемлекет басшысы Антониу Костаны Қазақстанға сапарлап келуге шақырды.