Еуропа қақпасы жабылып, ресейліктер шенгеннен шеттетілді 

2025 жылғы 10 қарашадан бастап Еуропалық одақтың жаңа ережелері күшіне енеді, олар ресейліктер үшін көп мәртелік шенген визаларын алу мүмкіндігін іс жүзінде жояды, деп хабарлайды Orda.kz еуропалық БАҚ-қа сілтеме жасап.

«Енді визаға өтініш берген РФ азаматтарына қысқа мерзімге бір рет келуге ғана рұқсат беріледі. Тек айрықша гуманитарлық жағдайлар үшін  ерекшеліктер қарастырылған» деп хабарлады Германия Сыртқы істер министрлігі.  

Берлиндегі жаңа шектеулер Ресейдің Украинаға қарсы жойқын соғысына және еуропалық тараптың пікірінше, ЕО қауіпсіздігі мен қоғамдық тәртібіне қауіп төндіретін гибридтік әрекеттерге негізделген.

Еурокомиссия бірнеше мәртелік визалар Еуроодақ азаматтары мен резиденттерінің туыстары, сондай-ақ көлік саласының қызметкерлері сияқты ресейліктердің шағын тобы үшін ғана қолжетімді болатынын нақтылады. Олар үшін қосымша шарт ретінде соңғы екі жылда дұрыс пайдаланылған алдыңғы визалардың болуы белгіленді. Атап айтқанда, ЕО тұрғындарының туыстары мультивизаға бір жылға дейін, ал екі арада көлік айдайтындар  тоғыз айға дейін рұқсат ала алады.

Қалған ресейліктерге енді кіру құжаттарын қайта рәсімдеуге тура келеді, Еурокомиссия өкілі Маркус Ламмерттің айтуынша бұл өтініш берушілерді мұқият тексеруге мүмкіндік береді. 7 қарашада жарияланған шешім өз аумағында тұратын және  консулдық округінде құжат тапсыратын Ресей азаматтарына қатысты.

Қазірге дейін берілген мультивизалардың әрекеті жалғасады, алайда жаңа ережелер Шенген аймағының бірнеше елі арқылы транзиттік бағыттар кезінде де көп мәртелік виза алу мүмкіндігін болдырмайды. Еурокомиссия достастық мүшелеріне, мысалы, тәуелсіз журналистер, құқық қорғаушылар мен диссиденттер үшін, қысқа мерзімге немесе керісінше, бес жылға дейін виза беру құқығын қалдырды.

 Іс жүзінде ЕО елдерінің көпшілігі ресейліктерге деген көзқарасын бұрыннан қатаңдатқан. Ресей туристік индустрия одағының мәліметінше, екі жылдан астам уақыт бойы Грекия, Италия және басқа да мемлекеттер визаларды тек сапар мерзіміне ғана береді. Осы күнге дейін тек Франция ғана РФ азаматтары қысқа мерзімді мультивиза ала алатын санаулы елдердің бірі болып келді, бірақ енді ол да жаңа жалпыеуропалық ережеге бағынуға мәжбүр болады.

2023 жылдан бастап Қазақстан өз азаматтары үшін шенген визасының құнын төмендетуді, мұндай визаны алу үшін қажетті құжаттардың санын азайтуды қолға алған. 

Былтыр 1 желтоқсаннан бастап Ресей елге кірген шетелдіктердің биометриялық деректерін жинай бастады.