Еуроодақ су тасқыннан зардап шеккен қазақстандықтарға 200 мың еуро бөледі

Еуропалық Одақ Қазақстандағы алапат су тасқынынан зардап шеккен отбасыларға гуманитарлық көмек көрсетеді. Ол Қызыл Жарты ай қоғамы арқылы беріледі, деп хабарлайды Orda.kz.

ЕО делегациясының баспасөз қызметі қолдау көлемі 200 мың еуро болатынын атап өтті. Қаржыландыру тікелей емес, табиғи апаттан зардап шеккен қазақстандықтарды тұрмыстық және гигиеналық заттармен, сондай-ақ ақшалай қамтамасыз ететін Қазақстан Республикасының Қызыл жарты ай қоғамының қолдауы арқылы жүзеге асырылатын болады.

«Алдағы үш айда көрсетілетін гуманитарлық көмек су тасқынынан ауыр зардап шеккен бес мың адамға тікелей көмек көрсетеді. Әйелдер басқаратын үй шаруашылықтарына, мүмкіндігі шектеулі немесе қарт адамдарға, сондай-ақ үштен көп баласы бар отбасыларға көмек көрсетуге ерекше назар аударылады» делінген хабарламада. 

Бұған дейін қазақстандық компаниялар мен жеке тұлғалар табиғи апаттан зардап шеккен отбасыларды қолдау үшін «Қазақстан халқына» қорына 2,5 миллиард теңгеден астам қаржы аударғаны белгілі болды. Бұл ақшаға қоса қордың өз қаражатына су тасқынынан қираған үйлердің орнына 500-ге жуық жаңа үй салынады.