Ескі банкноттарды жаңаларына айырбастау кезеңі әлі шектелмейді

Қазақстан Ұлттық Банкі банкноттарды, оның ішінде 2006 жылғы үлгідегі купюраларды айырбастаудың мерзімсіз кезеңін енгізу туралы шешім қабылдады, деп хабарлайды Ұлттық банктің баспасөз қызметі.

Жаңа дизайндағы банкноттарды шығару кезінде 12 ай ішінде қатар айналыс кезеңін белгілеу ұсынылады. Көрсетілген мерзімнен кейін екінші деңгейдегі банктер ескі үлгідегі купюраларды үш жыл бойы жаңа үлгідегі ақша белгілеріне, ҚР Ұлттық Банкінің филиалдарына – мерзімсіз айырбастайтын болады.

Ел азаматтары нормативтік-құқықтық актілерге тиісті өзгерістер енгізілгеннен кейін Ұлттық банктің филиалдарында ұлттық валютаның қолданыстағы ақша белгілеріне банкноттарды айырбастай алады.

2021 жылғы 1 ақпанда 2006 жылғы үлгідегі номиналы 2000, 5000 және 10000 теңгелік банкноттарды ауыстыру мерзімі аяқталды. Ұлттық Банк мұндай банкноттардың Қазақстанның барлық аумағында қабылдануға және айырбастауға жатпайтынын және заңды төлем құралы болып табылмайтынын хабарлады.