Есірткі сатумен айналысқан 55 telegram-арна жабылды

Қазақстанда жыл басынан бері есірткі сататын 55 telegram-арнасы жабылды. 

Бұл туралы Қаржы мониторингі агенттігінің баспасөз қызметі хабарлайды.

Жыл басынан бері есірткінің заңсыз айналымына қатысты 60 қылмыстық іс қозғалды. Оның жартысы контрабанда фактілері бойынша. 100-ден астам адам ұсталды, оның ішінде 12-сі ұйымдасқан қылмыстық топтың мүшесі. Айналымнан 100 келіге жуық ауыр есірткі заттары – кокаин, кетамин, мефедрон және марихуана табылды.

Оларды өндіруге арналған 1 тоннадан астам прекурсорлар тәркіленді. Қылмыстық жолмен алынған ақшаны жіберіп отырған 30 мыңға жуық банк картасы бұғатталды. Сондай-ақ, мефедрон бар ең үлкен telegram-арна Шымкенттен табылған, ол жерден 1 тоннадан астам қышқыл тәркіленді.

«50 мыңнан астам адам қатысатын есірткі сататын 55 telegram-арнасының заңсыз қызметі жойылды. Мұндай «дәріхананың» жалпы айналымы шамамен 48 млрд теңге болды», — деді қаржы мониторингі агентігінің ресми өкілі Әлібек Әбділов. 

Сонымен қатар қатар қаржы мониторнигінің мәліметінше, Қазақстан, Беларусь және Ресей аумағында үш ірі «есірткі дүкені» жабылды, 35 есірткі сатушы ұсталды. 1 тоннадан астам психотроптық заттар мен клиенттерге сатуға дайын тұрған 3,5 мың дозаға жуық синтетикалық есірткі тәркіленді. Халықаралық есірткі саудагерлерінің жалпы табысы шамамен 30 миллион АҚШ доллары, оның 12 миллионы криптовалютамен шығарылды.

«Сондай-ақ,  ұлттық банктерде бір клиентке бірден бірнеше карточка шығаруға шектеулер қойылады. Бейрезиденттерге және кәмелетке толмағандарға төлем карточкаларын беру кезінде қосымша бақылау шаралары мен шектеулер белгіленді. Жаңа клиентті тіркеу кезінде міндетті биометриялық сәйкестендіруі бар төлем карталарын шығару бойынша банктердің ішкі бақылау шаралары күшейтілді. Бұл есірткінің заңсыз айналымы фактілерін одан әрі анықтауға мүмкіндік береді», — деді қаржы мониторингі агенттігі.