Есірткі сатқан мұғалім бас бостандығынан айрылды

Түркістан облысында есірткі сатқан мұғалім 10 жылға сотталды

Бұл туралы Orda.kz Polisia.kz сайтына сілтеме жасап хабарлады.

Жергілікті полиция бөліміне жергілікті тұрғындардың бірі Бәйдібек ауданының тұрғыны есірткінің ірі көлемін заңсыз сақтап, өткізумен айналысатыны туралы хабарлама келген. Тексеріс барысында есірткі сату қылмысына қатысты күдіктіні қолға түсірген. Ол аудан мектептерінің бірінде қазақ тілі пәнінен сабақ беретін мұғалім болып шықты.

Мұғалімнің тұрғылықты мекенжайын тінту кезінде оның асханасындағы шкафтың үстінен 10 дана бөлек пакеттерге салынған жалпы салмағы 3 келіден астам «кептірілген марихуана» тәркіленді. Тергеу барысында күдікті есірткі заттарын сату үшін бөліп, пакеттерге салғанын мойындады.

– Сотқа дейінгі тергеу амалдарын жан-жақты жүргіздік. Күдіктіден барлық айғақты заттар тәркіленді. Сатуға, сақтауға, өткізуге, қолдануға заңмен тыйым салынған затты сату қылмысын соңына жеткізу бағытында қарқынды қызмет атқардық. Жинақталған іс-құжаттарын айыптау актісімен аудандық сотқа жолдадық. Соттың үкімімен 47 жастағы күдікті ҚР ҚК-нің 297-бабымен кінәлі деп танылып, оған 10 жыл мерзімге бас бостандығынан айыру жазасы тағайындалды, – деп атап өтті тергеуші Асқар Шубай.