«Есірткі сақтаған»: Әкімдік қызметкері пара алды

Астана әкімдігінде қызметкер пара алғаны және есірткі сақтағаны үшін 15 млн теңге айыппұл арқалады, деп хабарлайды Orda.kz. 

Іс материалдары бойынша айыпталушы адам «Қалалық орта сапасы және бақылау басқармасы» еңбек қатынастары бөлімінің бас маманы болып қызмет атқарған. Ол өзге компанияға қатысты тексеру жүргізбегені үшін ЖШС директорынан 250 мың теңге пара алған. Сондай-ақ, кәсіпорын басшысы инспектордан бұрынғы қызметкердің шағымы бойынша оны жауапқа тартпауын сұраған. Айыпталушы ақшаны алғаннан кейін, өтініш берушіге тексеру жүргізбеген. 

Сонымен қатар айыпталушы салмағы 0,08 грамм болатын психотроптық затты заңсыз сатып алған. Оны өзімен бірге заңсыз сақтағаны да анықталды. 

Астананың ауданаралық соты оны кінәлі деп танып, 15 млн теңге айыппұл тағайындады. ЖШС директорына 6,6 млн теңге айыппұл салынды. Сондай-ақ, оларға мемлекеттік қызметте өмір бойы қызмет атқаруға тыйым салынды.