Есірткі контрабандасына күдікті Ресейден Қазақстанға экстрадицияланды

Аса ірі көлемде есірткі тасымалдады деген күдікке ілінген Қырғызстан азаматы Ресейден экстрадицияланды.

Бұл туралы Бас прокуратураның баспасөз қызметі хабарлады.

«Аса ірі көлемде есірткі контрабандасына қатысты қылмыстық жауапкершілікке тарту үшін Қырғызстан азаматы Ресей Федерациясынан экстрадицияланды»,  делінген хабарламада.

Күдікті 2023 жылдың маусым айында бір топ адаммен бірлесіп, бірнеше мемлекет арқылы 60 келіге жуық героин мен 10 келіден астам гашишті заңсыз алып өтуді ұйымдастырды. Сотқа дейінгі тергеу барысында күдіктіге халықаралық іздеу жарияланды.

Оның 2023 жылдың тамызында Мәскеуде ұсталып, Қазақстанға экстрадицияланғаны хабарланды. Қазір ол уақытша ұстау изоляторына қамалды.

Бұл қылмысы үшін оны 15 жылдан 20 жылға дейін бас бостандығынан айыру немесе мүлкі тәркіленіп, өмір бойына бас бостандығынан айыру түріндегі жаза күтіп тұр.