Есімов «Самұрық-Қазына» қорының басшысы қызметінен кетті

Елбасы Ахметжан Есімовке «Самұрық-Қазына» АҚ басқарма төрағасы ретіндегі жемісті жұмысы үшін алғыс айтты.

Бұл туралы Orda.kz Елбасы сайтына сілтеме жасап хабарлады.

Нұрсұлтан Назарбаев Ахметжан Есімовтің басшылығымен «Самұрық-Қазына» қоры БҰҰ есебінің 20 жетекші халықаралық қорына кіріп, дамудың сапалы жаңа деңгейіне шыққанын атап өтті.

– Мұндай нәтиже көп жағдайда Ахметжан Есімовтің жоғары жауапкершілігі мен оның үлкен кәсіби тәжірибесінің арқасында мүмкін болды. Ол өзіне жүктелген міндеттерді тиімді шешті, - делінген хабарламада.

Ахметжан Есімов Елбасына жоғары сенім білдіргені үшін алғысын білдіріп, қор қол жеткізген нәтижелер елдің жалпы табысының аз ғана бөлігі екенін, бұл Тұңғыш Президенттің әл-ауқатқа бағытталған саясатының арқасында мүмкін болғанын атап өтті.

Ахметжан Есімов 2017 жылдың желтоқсан айынан бастап «Самұрық-Қазына» ұлттық әл-ауқат қорының басқарма төрағасы қызметін атқарды.

ҚР Премьер-Министрі Асқар Мамин басқарманың жаңа төрағасы Алмасадам Сатқалиевті «Самұрық-Қазына» Ұлттық әл-ауқат қоры АҚ ұжымына таныстырды. Ол басшылыққа тағайындалды.