Есік қаласының әкімі пара алғанын мойындады

Алматы облысы Есік қаласының әкімі пара алды деген күдікке ілінді.

Бұл туралы Сыбайлас жемқорлыққа қарсы іс-қимыл агенттігі айтты.

«Жергілікті атқарушы органдардың сыбайлас жемқорлық қылмыстық құқық бұзушылық жасаудағы заңсыз әрекеттері туралы азаматтардың арыз-шағымдарына жедел әрекет ету нәтижесінде Алматы облысы Есік қаласының әкімі парамен ұсталды» делінген хабарламада.

Ол қаланың балалар алаңын абаттандыру бойынша мемлекеттік сатып алу туралы шарт бойынша бюджет қаражатын еш қиындықсыз төлеу үшін жеке компания өкілінен қомақты көлемде пара алды деген күдікке ілінді.

«Күдікті өз кінәсін толық мойындады. Сотқа дейінгі тергеу жалғасуда» деді Антикор баспасөз қызметі.