Ешкімді «аспаннан жауған ақшамен» қаржыландырмаймыз – вице-министр

Мәдениет және ақпарат вице-министрі Евгений Кочетов Қазақстанның шығармашылық индустриясы үшін «тікұшақтан ақша жаумайды» деп айтты.

Бұл туралы вице-министр Astana Open Dialogue кезінде айтты.

«Ешқандай «тікұшақтан жауған ақшамен» жобаларды (шығармашылық индустрияны) артынан қуып жүріп қаржыландырмаймыз. Біз мемлекеттік мекеме ретінде өз алдымызға түпкілікті мақсаттар қойып, алға жылжимыз. Мәдениет туралы айтатын болсақ, алдағы көрсеткіштерді белгілеген кезде осы спектакльдерге қатысқан адамдардың санына қараймыз. Бұл жағдайда біз санға көбірек назар аударамыз. Сондықтан, әрине,  ешқандай «тікұшақтан ақша» жаумайды. Маған сеніңіз, олай болмайды», – деді Кочетов.

Мысал ретінде ол грант арқылы жұмыс істейтін азаматтық қоғаммен жұмыс тәжірибесін келтірді.

«Шығармашылық индустрияда ондай болмайды. Оны шынымен қажет ететін жаңа жобаларға қолдау көрсетіледі. Жобаларды таңдаудың нақты алгоритмі болады. Өйткені шын мәнінде көп адамдар өз ісімен айналысқысы келеді. Оларға дағдылар мен дайындық жетіспейді. Мен ақша мен инвестиция туралы айтқанда: біз адамдарды оқытамыз, олармен бірге акселерация бағдарламаларынан өтеміз. Әйел эксклюзивті нан пісіреді делік. Біз оны сатуға болатындай етіп жасауды үйретеміз, ол сатылым құра алады, сонда ол Instagram аккаунтын ашып, оны сол жерде дамыта алады. Яғни, жауап – «аспаннан жауған ақша» жоқ, біз жай ғана бизнес жүргіземіз», – деп түсіндірді Кочетов.

«Аспаннан жауған ақша» – экономиканы «қайта іске қосу» үшін тікұшақтан ақшаны шашу түрінде бейнелі түрде жүзеге асырылатын ақша эмиссиясын білдіретін термин.