«Ешкім ешқайда кеткен жоқ»: Бас прокуратура Мәсімовтің ісі бойынша

Бас прокурордың орынбасары Әсет Шыңдалиев Ұлттық қауіпсіздік комитетінің бұрынғы төрағасы Кәрім Мәсімовке қатысты барлық айыпталушылардың қамауда екенін айтты.

Істі ҰҚК тергеп жатыр, құпия санатқа жатады.

 — Материалдар таратуға жатпайды. Бұл істерге қол жеткізе алатын бірнеше прокурорлар бар. Аталған іс бойынша күдіктілердің барлығы қамауда, ешкім қашып кеткен жоқ. Іс аяқталды, іс материалдарын зерделеу басталды. Іспен танысу үшін біз ешқандай процессуалдық шектеу қойған жоқпыз, - деді Шыңдалиев Мәжіліс сыртында.

Еске салсақ, қаңтар оқиғасы кезінде Мәсімов ҰҚК басшысы қызметінен алынып, мемлекетке опасыздық жасады деген күдікпен қамауға алынып, оның орнына Ермек Сағымбаев тағайындалған болатын. ҰҚК бастығының бұрынғы орынбасарлары Әнуар Садықұлов, Марат Өсіпов және Дәулет Ерғожин да қамауда отыр. Мәсімовтің бірінші орынбасары болған Самат Әбіш бостандықта жүр, бірақ ол да тергеу аясында.

Кейінірек Мәсімовтің де билікті күштеп басып алуға, билікті асыра пайдалануға бағытталған әрекеттері, сондай-ақ сыбайлас жемқорлық қылмыстары, атап айтқанда, жабық келісім-шарттардың бірі бойынша шет мемлекеттің өкілдерінен пара алу фактілері бойынша күдікті екені белгілі болды.