«Ертіс» футбол клубының бұрынғы директоры екі жылға бас бостандығынан айрылды

Павлодарда салық төлеуден жалтарған «Ертіс» футбол клубының бұрынғы директоры екі жылға бас бостандығынан айрылды.

«А.Қ.Тұрсықпаев  салық органына бұрмаланған мәліметтермен декларация тапсыру арқылы «Ертіс» футбол клубы қоғамдық қорына жалпы сомасы 300 600 607 теңгені құрайтын бюджетке төленбеген салықтар түрінде мемлекетке залал келтірді, бұл аса ірі сома болып есепетеледі» делінген №2 сот залында оқылған  үкімде.

Сот отырысында сотталушы өз кінәсін мойындау туралы жауап беруден бас тартты.

Оның айтуынша, 2018 жылдың мамыр айында «Ертіс» ФК»  директоры болып жұмысқа қабылданған кезде оған оқумен айналысу, қаржы мәселесін қордың бас есепшісіне беру ұсынылған. Оның компьютеріне электрондық цифрлық қолтаңба орнатылған, Ардақ Тұрсықпаев құжаттарға ешқашан қол қоймаған

Алайда Тұрсықпаевтың есепшіге қол қою құқығын бермегені сенімді түрде анықталды. Әйел директордың қылмыстық ниетінен күдіктенбеген. Ол оның нұсқауларын орындады, кірістер мен шығыстар туралы бұрмаланған ақпаратты көрсетті, онда  «Ертіс» ФК» негізгі ойыншыларының жалақысы төмен бағаланды.

Нәтижесінде сот 51 жастағы Ардақ Тұрсықпаевты Қылмыстық кодекстің 245-бабының 3-бөлігінде көзделген қылмыстық құқық бұзушылықты жасағаны үшін кінәлі деп танып, үш жылға бас бостандығынан айыру жазасын қауіпсіздігі ең төмен түзеу мекемесінде өтеу туралы үкім шығарды.

Жақында жарияланған рақымшылыққа байланысты бас жазаның өтелмеген бөлігінің мерзімі мен мөлшері үштен біріне қысқартылды. Сот ақыры «Ертіс» ФК бұрынғы директорын қылмыстық-атқару жүйесінің ең төменгі қауіпсіздік мекемесінде 2 жылға бас бостандығынан айыру жазасына кесті.

Қылмыстық жауаптылықты жеңілдету ретінде сот бірінші рет қылмыс жасауды, оң сипаттама беруді, сондай-ақ Тұрсықпаевтың жеке пайда үшін емес, футбол клубының мүддесі үшін салық төлеуден жалтару фактісін таныды.

Үкім заңды күшіне енген жоқ.

Еске салайық, павлодарлық «Ертіс» футбол клубының (ФК) бұрынғы директоры Серік Умарханов өткен жылдың мамыр айында бір жылға бас бостандығынан айырылған болатын.