Ертаев Әубәкіровке хабарласқан Ресей генералдары туралы айтты

Халық қаһарманы, генерал-лейтенант Бақытжан Ертаев сұхбат беріп, қаңтар оқиғасы, Бектановтың қателігі, сарбаздар арасындағы суицид туралы пікір білдірді.

Ертаевтың пікірінше, қаңтар оқиғасы кезінде ҰҚШҰ әскерінің келгені дұрыс болған. Сондай-ақ, қаңтар оқиғасы кезінде Тоқтар Әубәкіровке қоңырау шалған Ресей генералдары туралы айтты.

– Тоқтар Оңғарбайұлы қазақтың тұңғыш ғарышкері, сыйлаймыз. Қаңтар оқиғасында тәртіпсіздікті тоқтатпағанда, Ресейдің шабуылы бізге бағытталар еді деген сөзіне қосылмаймын. Украина мен Ресей арасында 2014 жылдан бері соғыс болып жатыр. Ресейдің Украинаға басып кіретіні бұрын мәлім болған. Бұл сөзге сенбеймін. Қазір өсек шығып жатыр. Ресей бұл соғыстан кейін Қазақстанға кіреді дейді. Біз қарап тұратын елміз бе? Біз иманды, батыр халықпыз, – деді Ертаев «Сұрауы бар» ютуб арнасына берген сұхбатында.

Генерал-лейтенант Қазақстанның бірінші президенті Нұрсұлтан Назарбаевтың туыстары туралы айтты.

– 30 жыл – бір күн емес. 30 жыл ішінде жас бала шаңырақ құрады. Осы жылдардан неге нәтиже көрмейміз, еліміз қандай дәрежеге жетті? Бір сәтте шарт ететін қазақпыз. Осы күнге дейін, біз қазақпыз, өсіп-өніп жатырмыз, экномикамыз өсті, жастар білім алды, елорда тұрғыздық, жолдар жөнделді дедік. Бір күнде мұның бәрі бекер дүние екен дедік. Тамыр әлсіз болса, ағаш шіріп құлайды. Елімді тонаған – ел дұшпаны, болашағын тоқтатқан – жауыз. Мен Мәскеудегі генштабта оқып жүргенде басқа ұлттың генералдары «қандай бақыттысың, президенттерің білімді, ашық» дейтін. Біз кешірімді халықпыз. Шетелге қаражат тасыған Назарбаевтың туыстары алғанын қайтарып, кешірім сұраса билік кешуі мүмкін. Ол кісі де адам баласы ғой, жүрегіне қатты тиген шығар. Назарбаев туыстарын тоқтату керек еді, – деді Халық қаһарманы.