Ермекбаев пен Сапарбаев жарылыстан қаза болғандардың отбасына көңіл айтып барды

Кеше Қорғаныс министрі Нұрлан Ермекбаев пен Жамбыл облысының әкімі Бердібек Сапарбаев жарылыс салдарынан қаза тапқан әскерилер мен өрт сөндірушілердің отбасыларына барып көңіл айтты.

Бұл туралы  Orda.kz  облыс әкімдігінің баспасөз қызметіне сілтеме жасап хабарлады.

— Қорғаныс Министрі Нұрлан Ермекбаев пен Жамбыл облысының әкімі Бердібек Сапарбаев Байзақ ауданында болған жарылыс салдарынан қаза тапқан әскерилер мен өрт сөндірушілердің отбасыларына барып, Қазақстанның Тұңғыш президенті – Елбасы Нұрсұлтан Назарбаев, президент Қасым-Жомарт Тоқаевтың атынан қайғыларына ортақтасып, көңіл айтты. Марқұмдардың қызметтік міндеттерін атқару кезінде ерлікпен қаза тапқанын айрықша атап өтіп, олардың отбасыларына мемлекет тарапынан тиісті барлық көмек көрсетілетінін жеткізді, - делінген ресми хабарламада.

 Алдын ала ақпарат бойынша, ауруханаға ТЖД 49 қызметкері түскен. Оқиға орнында министр бастаған ТЖМ жедел тобы жұмыс істеуде. ҚР ТЖМ ДЖБО-да және өрт орнында КШМ базасында өрт сөндіру штабы құрылып, Жамбыл облысы ТЖД-де жедел штаб жұмыс істеп жатыр. Сонымен қатар, апаттан кейін Нұрлан Ермекбаев өз еркімен қызметінен кетуге дайын екенін жеткізді.