Ермұхамет Ертісбаев Халық партиясының мүшесі атанды

Нұрсұлтан Назарбаевтың бұрынғы кеңесшісі, Қазақстанның бұрынғы мәдениет және ақпарат министрі Ермұхамет Ертісбаев Қазақстан халықтық партиясына мүше болды.

Бұл туралы депутат, мәжілістегі Халық партиясы фракциясының жетекшісі Айқын Қоңыров мәлімдеді.

«Бүгін партиямызда айтулы оқиға. Біз өз қатарымызға белгілі мемлекет қайраткері, ел патриоты Ермұхамет Қабидинұлы Ертісбаевты қабылдадық. Партия мүшесінің бай өмірлік тәжірибесі, білімі мен біліктілігі елге қызмет ететініне сенімдіміз.

Тек партияның игілігі үшін емес, бүкіл Қазақстан үшін партияны жаңарту жалғасуда. Біз бірлесе отырып, қалаған нәтижеге қол жеткізе аламыз. Әрі қарай бұл бұдан да жақсы болады» деп жазды Айқын Қоңыров өзінің Facebook парақшасында.

Еске салсақ, Алматы қаласы мәслихатындағы Халық партиясы фракциясының депутаты Ақбөпе Әбілқасымова Қазақстан жерін Владимир Ленин мен Кеңес билігінің арқасында алдық деп есептейді.

 «Ленин мен Кеңес өкіметінің арқасында біз өз жерімізді алдық. Мұны есте сақтау керек» делінген депутат Әбілқасымованың жазбасында.

Еске салсақ, бұл Халық партиясының қоғамда резонанс тудырған бірінші мәлімдемесі емес. Мәжіліс депутаты, Қазақстан халық партиясының хатшысы Жамбыл Ахметбеков те ашаршылықтан қырылған адамдар саны мен репрессияға ұшырағандар саны дұрыс еместігін, оның айтылып жүрген мөлшерден аз екенін айтқан болатын.

– Халықты мен қырған жоқпын, коммунистік партия қырған жоқ. Коммунистік идеология мен коммунистік тәжірибені шатастырмау керек. Аштықтан қырылғандар саны қазір 4 млн, кейін 6 млн, 8 млн болып кететін шығар. Негізі, 700 мың адам репрессияға ұшырады. Соның 25 мыңы атылған. Ол кезде жалпы қазақтың саны 4 млн болатын.

Кезінде ел басына күн туғанда кетіп қалғандар енді оралып жатыр. Ел басына күн туса, елді қорғайтындар аз болады. Келсін, біздің партияның еш қарсылығы жоқ. Алаш қайраткерлері Кеңес одағына басқа тактикамен қарсы шықпай, бірден қарсылық білдірген соң атылып кетті,- деді Ахметбеков.

Сонымен қатар, олар Ресей президенті Владимир Путин ДХР және ЛХР мемлекеттерін мойындау туралы шешімін айтқан кезде Украина жерін «Владимир Лениннің үлкен сыйлығы» деп атаған болатын.