Ерлі-зайыптыларды мерт қылған жарылыс: Атыраудағы жанармай бекетінің директоры ұсталды

Атырау облысы Құлсары қаласына жақын орналасқан Тұрғызба ауылындағы «Ниет» автогаз құю бекетінде болған қайғылы оқиғадан кейін екі ай өткен соң, бекеттің директоры ұсталды, деп хабарлайды Orda.kz тілшісі.

Атырау қаласының мамандандырылған тергеу сотының қаулысымен ол үй қамаққа алынды.

Еске сала кетейік, 2025 жылдың мамыр айында болған жарылыс салдарынан ерлі-зайыпты қаза тапқан болатын. Артында үш бала қалды. Жарылыстан зардап шеккендерді ауыр күйік шалып, олардың мүрдесін тану мүмкін болмады. Жұбайлардың денесін туыстары екі айға жуық уақыт жерлей алмай, сот-медициналық сараптама нәтижесін күтті.

Бұл трагедия қоғамда үлкен резонанс тудырды. Шағымның көптігі мен арыздарға қарамастан, «Ниет» жанармай құю бекеті жұмысын жалғастырып келді.

Қазір тергеу мәліметінше, бекет директоры қылмыстық іс бойынша күдікті ретінде танылып отыр. Жарылыстың ресми себебі әлі жарияланған жоқ. Дегенмен бұған дейін Төтенше жағдайлар департаменті газдың сыртқа шығуы мен ұшқыннан тұтанған өрт болуы мүмкін екенін мәлімдеген.

Тергеу амалдары жалғасып жатыр. Қаза болған отбасының туыстары Бас прокуратурадан істі бақылауға алуды сұрап отыр.

Еске сала кетейік, 30 мамыр күні Құлсарыда жанармай құю бекеті жарылып, 16 адам зардап шекті. Ерлі-зайыпты болған екі адам көз жұмды. Сол қаланың тұрғыны Ләйлә Сұлтанбаева тілшілерімізге оқиғаның қалай болғанын баяндап берген еді.