Ерлан Тұрғымбаев қаза тапқан полицейлер отбасына мемлекеттік наградалар тапсырды

Ішкі істер министрі Ерлан Тұрғымбаев Алматы қаласына арнайы келіп, жергілікті полиция департаментінің екі қызметкерінің отбасына мемлекеттік наградаларды тапсырды.

Олар 2021 жылғы 20 қыркүйекте қызметтік міндеттерін атқару кезінде қаза тапқан болатын.

 — Біздің әріптестеріміз, полиция майоры Дархан Сүлеев пен полиция капитаны Нұрбол Байғазиев қызметтік міндеттерін адал атқарып, әріптестеріне үлгі болып, болашаққа жоспар құрды. Олардың өмірін қиған қайғылы оқиға барлық қазақстандықтарды дүр сілкіндірді», - деді ІІМ басшысы.

 Учаскелік полиция инспекторлары Дархан Сүлеев пен Нұрбол Байғазиев қаза тапқан соң Президент Қасым-Жомарт Кемелұлы Тоқаевтың Жарлығымен ІІ дәрежелі «Айбын» орденімен марапатталды. 

 — Бүгін мен Мемлекет басшысының тапсырмасы бойынша оларды тапсыру үшін келдім, - деп қосты  Ерлан Тұрғымбаев.

Сонымен қатар министр ішкі істер органдары қызметкерлері қызметтік борышын өтеуде  әрдайым қылмысқа қарсы күрестің және азаматтардың қауіпсіздігін қамтамасыз етудің алдыңғы қатарында екенін атап өтті. 

Полицейлердің күнделікті жұмысы өздерінің өмірлері  мен денсаулықтарына  қауіпті. Сын жағдайларда бірнеше секунд ішінде  жауапты шешімдер қабылдауға тиіс. Сондықтан басын қатерге тігіп, елге қызмет етіп жүрген жандар қандай марапатқа да лайық.