Ерлан Саиров «ана капиталын» енгізуді ұсынды

Мәжіліс депутаты оны елімізде жаңадан құрылған «Қазақстан халқына» қоры аясында жүзеге асыруға болады деп ойлайды.

Мәжіліс депутаты Ерлан Саиров әлеуметтік желідегі парақшасында «Қазақстан халқына»  қоры аясында «ана капиталын» енгізуді ұсынуда. Оның ойынша бұл  Қазақстанның демографиясына үлес қосып, көп балалы жанұяларды әлеуметтік қорғаудың құралы бола алады.

Сонымен қатар депутат ауыл жастарының тағдырана алаңдап, оларды әлеуметтендіру мәселесіне көңіл аударуға үндеді.

«Қазақстанда кедейлік мәселесімен күрестің өзі көп қаржыны талап етеді. Жастарымызды, әсіресе ауыл жастарын әлеуметтендіру – өте терең проблема. Осыған көңіл аударған абзал. Елімізде демографиялық жағдайды көтеруді шапшаңдату өте маңызды»  деп жазды депутат өз парақшасында.

Мәжіліс депутаты Ерлан Саиров  бұған дейін бірінші президент уәде еткен мұнайдан түскен қаржының бір бөлігін де осы қорға жіберуді ұсынды.