Ерлан Қошанов Премьермен жарыса неге Ресейге барды?

Мәжіліс төрағасы журналистің «Шенеуніктер Ресейге неге барғыштай береді? деген сұрағына жауап берді, деп хабарлайды Orda.kz порталы.

Журналистер Ерлан Қошановқа «Наурыздың 5-і күні сіз және Үкімет басшысы Олжас Бектенов жұмыс сапарымен Мәскеуге бардыңыздар. Біздің қоғамда «Шенеуніктер Ресейге неге барғыштай береді? деген алаңдаушылық бар. Ресейге неге премьермен бір уақытта бардыңыз?» деп сұрақ қойды.

«Бұл әдейі ұйымдастырылған нәрсе емес. Үкіметтер арасындағы өздерінің талқылайтын мәселелері бар. Ал менің барған сапарым - көптен жоспарланған ресми сапар. Сапар барысында Ресей думасының басшысы әріптесім Володинмен және федерация кеңесінің төрайымы Матвиенко ханыммен кездесу болды. Көптеген заң шығару жұмысы бойынша, басқа да мемлекет арасындағы қарым-қатынас мәселелері бойынша келіссөздер жүргізілді. Соның ішінде бірнеше мәселені айтып кетуге болады. Ол – біздің жүргізушілеріміздің, атап айтқанда Ресей мен Беларусь шекарасында, Қазақстан мен Ресей шекарадағы жүк тасу мәселелері. Сонымен қатар, Ресейде әскери оқу орындарында оқып жатқан қазақстандық студенттеріміздің мәселелері қарастырылды», – деді Мәжіліс төрағасы.

Журналистер тағы да «Дума төрағасы Володинмен кездескен кезде депутаттардың Қазақстанға қарсы пікір білдіргенін ескерттіңіз бе?” деп сұрады.

«Иә, бұл тақырыпта да әңгімелестік. Осы тақырып төңірегінде федерация кеңесінің басшысы Валентина Матвиенкомен де сұхбаттасқан едік. Алдағы уақытта біз бұл мәселе бойынша өзара жұмыс істейтін болып келістік», – деді ол.