Еріктілік туралы: Тоқаев БҰҰ Бас Ассамблеясының арнайы сессиясында сөз сөйледі

Бірнеше жыл бұрын Қазақстан халықаралық серіктестерімен бірлесе отырып, 2026 жылды Тұрақты даму жолындағы халықаралық еріктілер жылы деп жариялауды ұсынған еді. 5 желтоқсанда Нью-Йорктегі БҰҰ штаб-пәтерінде осы жылдың басталуына арналған арнайы сессия өтті, деп хабарлайды Orda.kz.

Сессияда Қасым-Жомарт Тоқаевтың бейнеүндеуі көрсетілді. Ол елімізде еріктілік қоғамдық өмірдің ажырамас бөлігіне айналғанын атап өтті. Президент «Таза Қазақстан» акциясын және Алматыда Орталық Азия мен Ауғанстан үшін БҰҰ-ның Тұрақты даму мақсаттары жөніндегі өңірлік орталығының ашылуын маңызды бастамалар ретінде мысалға келтірді.

Қазақстан Президенті барлық елдерді қоршаған ортаны қорғау, әлеуметтік интеграция және жастарды қолдау салаларындағы БҰҰ бастамаларына қосылып, тәжірибе алмасуға және бірлескен жобаларды іске асыруға шақырды.

«Қазақстан осы айтулы жыл бойы және одан кейінгі кезеңде де әлеуметтік маңызы бар еріктілік қызметті қолдау мақсатында БҰҰ-ға мүше барлық мемлекеттермен және азаматтық қоғаммен ынтымақтастықты жалғастырады»,
  деді Мемлекет басшысы өз үндеуінде.