Еріктілер легі тоқтамайды: Ресейде 318 мың адам жұмылдырылды

Ресей президенті Владимир Путин жұмылдырылған азаматтар санының 318 мың адамға жеткенін айтты. Оның айтуынша, еріктілер легі күні бүгінге дейін тоқтамаған.

— Бізде қазірдің өзінде 318 мың адам жұмылдырылған. Неге 318 мың? Өйткені еріктілер тоқтаусыз келіп жатыр. Еріктілер саны күннен күнге артып жатыр, - деді Путин.

Ол 49 мың жұмылдырылған ресейліктер қазірдің өзінде армияда және жауынгерлік тапсырмаларды орындап жатқанын түсіндірді. Қалғандары арнайы дайындықтан өткен.

Ресей президенті жұмылдырылғандардың артында отбасы, ата-анасы, әйелдері мен балалары қалғанын атап өтті. Ол мемлекет тарапынан оларға қолдау көрсетуге тырысатынын, соның ішінде жұмылдырылғандардың отбасыларына көмек көрсететін еріктілердің көмегіне жүгініп жатқанын айтты.