ERG сатыла ма? Миллиардер Ибрагимов активтер үшін талас-тартыс барын меңзеді

Компанияның негізін қалаушылардың бірі Александр Машкевич қайтыс болғаннан кейін акционерлер арасында дау туып, бұл мәселе бірнеше рет БАҚ-та жарияланды. Кейін бұл дау активтерді басқару құқығы үшін  күреске ұласты. Шухрат Ибрагимов акционерлер арасындағы даулар туралы айтып, компания активтерін сату жайлы қауесеттерге қатысты жауап берді, деп хабарлайды Orda.kz.

Қыркүйек айында миллиардер Шухрат Ибрагимов ERG-тің басқа акционерлеріне қарсы сотты жеңіп шықты. Алматыдағы экономикалық сот компанияның үшінші бөлігін иеленетін акционер Патох Шодиевтің талап арызын толықтай қанағаттандырмады. Сот шешімі бойынша компания 2025 жылғы 2 маусым және 30 шілдеде директорлар кеңесінің қабылдаған қаулыларын орындауға міндетті болып саналды. Сонымен қатар, «Еуразиялық банк» үшін жаңа директорлар кеңесін қалыптастыру заңды деп танылды.

Бұл корпоративтік дауға үш ірі тұлға қатысқан: 72 жастағы Патох Шодиев, оның қызы Муниса Шодиева және Шухрат Ибрагимов. Соттағы жеңіс Ибрагимовтің позициясын күшейтіп, оның қаржылық империядағы ықпалы мен бәсінің жоғары екенін көрсетті.

Расымен сата ма? Әлде бұл психологиялық ойын ба?

Интернетте түрлі қауесет тарады. АҚШ-тан келген белгісіз инвестор, акцияларды сату жөніндегі келіссөздер және т.б. Бірақ ERG басшысы Шухрат Ибрагимов активтерді сатып алу туралы сұраққа қысқа әрі салмақты: «Уақыт көрсетеді» деп жауап берді. Бұл сөз, бір жағынан, процестің жүріп жатқанын, бірақ барлық ақпарат жария етілмейтінін меңзейді.

Ибрагимов былай деді:

«ERG және оның Қазақстандағы да, Африкадағы да активтері сатылмайды. Бұл туралы ешқандай келіссөз жүріп жатқан жоқ. Барлық әңгімелер тек болжам ғана. Менің мақсатым — компанияны дамыту, жаңа өндірістер ашу және болашаққа инвестиция салу».

ERG және банк жайлы

Активтерді сату жөніндегі қауесеттерге қатысты Ибрагимов былай деді:

«Банк, сақтандыру компаниясы немесе қаржы тобының ешқайсысын сатуды жоспарлап отырған жоқпын». 

Кәсіпкер алғаш рет акционерлер арасындағы ішкі дау туралы айтты. Патох Шодиев пен оның қызы Мунисаның да осы дауға қатысы бар.

«Менің арыздарым тек менеджментке қатысты болды. Кез келген компанияда дау болады. Барлығының көзқарасы әртүрлі. Бірақ компания мен банк өз жұмысын жалғастырып, дамып келеді. Бұл қызметке әсер етпейді», — деп атап өтті ол.

Оның сөзінің жаны бар. Расымен соңғы жылдары ERG Қазақстанға салынған инвестициясын 40%-ға арттырды. 

Жаңа ірі жобалар қатарында:

• ERG Green — Хромтаудағы қалдықтарды қайта өңдеу, бюджеті 200 млн доллар;
• «Болашақ» шахтасы — 2 млрд доллар инвестиция, феррохром өндірісінде әлемдік рекорд;
• Ақтөбе облысындағы жел электр станциясы — 160 млн доллар, іске қосу 2025 жылы.

ERG мен оның активтерін сату жоспарланып отырған жоқ. Ибрагимов компанияны дамытуға бел буып отыр. Оның «уақыт көрсетеді» деген сөзі ERG империясын алғысы келгендерді қызықтыру үшін айтылған сөз секілді.

Бұған дейін Eurasian Resources Group Шухрат Ибрагимовтің басшылығымен швейцариялық Mercuria Energy Group-пен үш жылдық келісімге отырған. Келісім бойынша, Африкадағы ERG активтерін дамыту үшін 100 млн долларға дейін инвестиция тарту көзделген. Қаржы өндіріс қуатын арттыруға және жаңа жобаларды іске қосуға бағытталады.

Автор: Алина Пак