«Ерен еңбегі үшін» медалімен марапатталған «Қорғастың» бұрынғы басшысына үкім шықты

Қызылорда облысы кәсіпкерлік және өнеркәсіп басқармасының басшысы сотталды, деп хабарлайды Orda.kz.

Қызылорда қалалық соты баспасөз қызметінің мәлімдегендей облыстағы кәсіпкерлік және өнеркәсіп басқармасының басшысы Д. Әбсаттаровқа қатысты үкім шықты.

Ол ұлының оқуына 1,4 млн ақы төлеп, 6,8 млн тенге дизел отынын беру туралы заңсыз тапсырма берген. Әбсаттаров лауазымдық өкілеттіктерін асыра пайдаланғаны үшін кінәлі деп танылды. 

Бұдан басқа, шенеунік өңір кәсіпорындарына сұйытылған газдың тиісті көлемін алу құқығын шектеу арқылы бизнес субъектілеріне 26,9 млн теңге сомасында залал келтіріп, заңды кәсіпкерлік қызметпен айналысуға кедергі жасағаны үшін сотталды.

Сот үкімімен Әбсаттаровқа мемлекеттік қызметте және квазимемлекеттік сектор субъектілерінде лауазымдарды атқару құқығынан өмір бойына айыра отырып, 9 ай бас бостандығынан айыру түріндегі жаза тағайындалды. Сондай-ақ мемлекеттік марапаты — «Ерен еңбегі үшін» медалінен айыру туралы ұсыныс енгізілді.