Ердоғанмен үстел теннисін ойнаған Тоқаев ерекше қимыл көрсетті

Қазақстан президенті Қасым-Жомарт Тоқаев пен Түркия басшысы Режеп Тайып Ердоған үстел теннисін ойнады.

12 қазанда Түркия Президенті Астанаға мемлекеттік сапармен келді. Қос мемлекеттің басшылары Ақордада келіссөздер жүргізді.

Келіссөздер қорытындысы бойынша мемлекет басшыларының қатысуымен ресми делегация мүшелері бірнеше құжатқа қол қойды.

Бейнежазбадан байқағанымыздай, үстел теннисінде Қасым-Жомарт Тоқаев Ердоғанды жеңді. Бейнежазба көпшіліктің назарын аударып, мемлекет басшысының теннистегі қимылы тың екені туралы пікірлер айтылды. Айта кетейік, Тоқаев Ердоғанмен екінші рет үстел теннисін ойнады.

Қасым-Жомарт Тоқаев наурыз айында Алматыдағы жаңа заманауи үстел теннисі орталығына барып, спорт кешенінің инфрақұрылымымен танысты, сондай-ақ жас спортшымен үстел теннисін ойнады.

Қасым-Жомарт Кемелұлы екі жыл бойы Қазақстанның үстел теннисі Федерациясын басқарып, «Спорт шебері» атанған.