Ердоған Түркиядағы түркі тілдес халықтардың жұмысқа орналасу ережесін өзгертті

Түркия президенті Режеп Тайып Ердоған елдегі түркі тілдес шетелдіктердің жұмысқа орналасу тәртібін өзгертетін қаулыға қол қойды. Енді Ердоған Түркияда қандай түркі тілдес халықтардың заңды түрде жұмыс істей алатынын жеке өзі анықтайтын болады, деп хабарлайды Orda.kz. 

Қаулыға сәйкес, енді Түркияда қандай түркі тілдес қауымдастықтар жұмыс істейтінін президенттің өзі шешеді. Бұған дейін бұл мәселе министрліктер мен үкімет деңгейінде қаралып келді.

Енді жаңа жарлық бойынша Түркияда жұмысты бұл елде тұруға рұқсаты бар адамдар ғана істей алады. Түркияда әртүрлі жағдайларға байланысты тұруға мәжбүр болған азаматтар біліктілігі мен білімін түрік органдары мойындаған құжаттармен растауы керек. Қажет болған жағдайда кәсіби ұйымдардың мүшесі болуы тиіс. 

Енгізілген түзетулер түркі тілдес шетелдіктердің мемлекеттік және жеке мекемелерде жұмысқа орналасу жағдайларын реттейтін 1981 жылғы Заңның ережелеріне сай өзгертілді.

Бұған дейін құжат мәтінінде Түркия министрлер кеңесі шешім қабылдайтыны жазылған еді. Енді заң мәтіні «президенттің шешімімен» деп өзгертілді. 

Айта кетейік, бұған дейін Ердоғанның ұсынысымен Түркияның заңы қайта жазылған еді.