Ердоған Қырымды Украинаға қайтаруды халықаралық құқық талабы деп атады

Түркия президенті Режеп Тайып Ердоған Қырымды Украинаға қайтару халықаралық құқықтың талабы екендігін Қырым платформасы саммитінде айтты, деп хабарлайды Orda.kz.

Ердоған Түркия «Қырым аннексиясына» әу баста қарсы болғандығын және оның қазіргі таңдағы жағдайы одан әрі ушығып кеткендігін атап өтті.

«Украинаның аумақтық тұтастығы, егемендігі мен тәуелсіздігіне деген қолдауымыз өзгеріссіз қалады. Қырымды Украинаға қайтару – халықаралық құқықтың талабы», – деді Түркия президенті.

Қырым 2014 жылы наурызда референдумнан кейін Ресейдің құрамына енді. Киев пен Батыс елдері дауыс беру нәтижелерін мойындамады. Ресей президенті Владимир Путин Қырым мәселесін бірнеше рет жабық деп атады. Украинадағы қақтығысты шешу үшін Мәскеу «жаңа аумақтық шындықты» мойындауды талап етеді. Украина президенті Владимир Зеленский елдің 1991 жылғы шекараларына оралу келіссөздердің басты шарттарының бірі деп атады.