Ердоған: АҚШ пен Ұлыбритания Қызыл теңізді қанға бөктіргісі келеді

Түркия президенті Режеп Тайып Ердоған АҚШ пен Ұлыбритания Иран қолдайтын Йемендік шиіттердің Ансар Алла (хуситтер) қозғалысы нысаналарына соққы беру кезінде тең емес күш қолданды деді, бұл туралы Orda.kz TRT арнасына сілтеме жасап хабарлайды.

«Бұл әрекеттердің барлығы - пропорционалды емес күш қолдану. АҚШ Палестинада дәл осылай әрекет етуде. Иран осының барлығынан өзін қорғаудың жолдарын іздейді», - деді Түркия басшысы. 

Ол АҚШ пен Ұлыбритания Қызыл теңізді «қан теңізіне» айналдыруға тырысып жатқанын айтты.

Ердоғанның айтуынша, Түркия жаңалықтарды көптеген арналар арқылы алады: «Біз хуситтер сәтті жауап беріп жатқанын әртүрлі арналардан білеміз».

12 қаңтарға қараған түні АҚШ пен Ұлыбритания Йеменнің әртүрлі аймақтарындағы төрт провинциядағы нысандарға ондаған әуе шабуылын жасады. Кейін американдықтар қосымша соққылар жасады. 

АҚШ президенті Джо Байден шабуылдарды Қызыл теңіздегі кеме қатынасының еркіндігіне төнген қауіп-қатерге жауап деп атады және еш ойланбастан әрекет етуді жалғастыруға уәде берді.

Хусилер Жоғары саяси кеңесінің мүшесі Мұхаммед Әли әл-Хоуси X әлеуметтік желісінде АҚШ пен Ұлыбританияның Йеменге жасаған әуе шабуылдары лаңкестік жабайылықң әрі қасақана және негізсіз агрессия екенін атап өтті.

Хусилердің әскери өкілі Яхья Сария АҚШ пен Ұлыбританияның Йеменге 73 соққы жасағанын, бес хусит жауынгерін өлтіріп, алтауын жаралағанын айтты. Хусилер бұған дейін Қызыл теңіздегі әрекеттерінің тек Газа секторындағы палестиналықтарға көмектесу үшін Израильмен байланысы бар кемелерге бағытталғанын және аймақтағы кеме қатынасының еркіндігіне кедергі келтірмейтінін айтқан.