Ердоған екеуміз үнемі байланыстамыз – Нұрсұлтан Назарбаев

Нұрсұлтан Назарбаев Түркия Ұлы Ұлттық Жиналысының Төрағасы Мұстафа Шентоппен кездесті.

Бұл туралы Orda.kz Елбасының сайтына сілтеме жасап хабарлайды.

Кездесу барысында Қазақстанның Тұңғыш Президенті Түркістанда өтетін түркітілдес мемлекеттер Парламенттік Ассамблеясының мерейтойлық жалпы отырысында Мұстафа Шентопқа нәтижелі келіссөздер жүргізуді тіледі.

Елбасы Қазақстан мен Түркия арасындағы қарым-қатынастың 30 жылдағы даму динамикасы туралы айтып, Шентоптан Түркия Республикасының Президенті Режеп Тайып Ердоғанға өзінің ізгі тілегін жеткізуді сұрады.

- Тәуелсіздіктің алғашқы күндерінен бастап мен қазақ-түрік ынтымақтастығының дамуы үшін жұмыс істеймін. Қазір біздің қарым -қатынас серпінді дамып келеді. Біз президент Ердоғанмен үнемі байланыстамыз, - деді Қазақстанның Тұңғыш Президенті.

Өз кезегінде Шентоп жылы қабылдағаны үшін ризашылығын білдіріп, Елбасына Түркия Республикасының Президенті Режеп Тайып Ердоғанның құттықтау сөздерін жеткізді.