Ербаянның өлімі: Тапаншаға ұмтылған полицейдің әрекетіне құқықтық баға беріледі

Ербаян Мұхтардың қазасынан кейін әлеуметтік желіде оның туыстары мәйітті алып кетуге қарсы болған сәттен түсірілген видео тарады. Осыған байланысты Orda.kz редакциясына полиция департаменті түсініктеме берді.

ПД мәліметінше, полиция қызметкерлері оқиға орнына қайтыс болған адамның мәйітін Сот-медициналық сараптама орталығына жеткізуді ұйымдастыру үшін барған. Ведомствоның айтуынша, бұл рәсім өлімнің нақты себебін анықтау және заңнамада көзделген құқықтық шараларды қамтамасыз ету мақсатында жүргізіледі.

Сонымен қатар полиция қызметтік міндеттерін орындау барысында олардың заңды әрекеттеріне кедергі келтіру және физикалық күш көрсету фактілеріне тап болғанын мәлімдеді.

«Аталған оқиға бойынша қызметтік тергеп-тексеру жүргізілуде. Оның қорытындысы бойынша орын алған оқиғаға қатысы бар барлық адамдардың, оның ішінде полиция қызметкерлерінің де әрекетіне қатысты құқықтық баға берілетін болады», деп хабарлады полиция.

Бұған дейін  Orda.kz редакциясына Ербаян Мұхтардың әкесі Хамит Мұхтар видео жолдап, жұртты жалған ақпаратқа сенбеуге шақырған еді. Оның айтуынша, қазіргі уақытта отбасы Астанадағы мәйітхана алдында жүр. Хамит Мұхтардың сөзінше, Ербаянның мәйіті әлі ашылмаған, ал туыстары прокуратурадан қажетті құжаттарды күтіп отыр.