Ербаянның ісі бойынша тергеушіге іздеу салынды

Адвокат Инга Иманбай Ербаян Мұхтардың ісі бойынша тергеу жүргізілмей жатыр деп әлеуметтік желіде тергеушіні іздестіріп жатыр, деп хабарлайды Orda.kz.

Инга Иманбай Ербаянның ісін қолға алғалы 5 ай болды. Адвокаттың айтуынша, тергеуші Уәлихан Қыдырбай сот-медициналық сараптамадан басқа тергеу әрекеттерін жүргізбеген.

«Ербаян Мұхтардың ісі бойынша тергеушіні іздестіріп жатырмын. Бұл қалжың емес. Өкінішке қарай, тергеу бойынша жағдай осылай қалып отыр. Оқиға болғанына бір жылға жуық уақыт өткенімен, тергеу орнынан қозғалған жоқ. Мен қорғаушы ретінде іске кіріскен бес ай ішінде тергеуші Уәлихан Қыдырбай сот-медициналық сараптамадан басқа ешқандай тергеу әрекетін жүргізген жоқ. Ол оқиға орнындағы фото, видео материалдарды және іс құжаттарын көрсеткен жоқ», – деді Инга Иманбай.

Адвокат істің мән-жайын біле алмағандықтан Бас прокуратураға шағым түсіруге мәжбүр болды.

«Іс бойынша туындаған сауалдарға жауап алу үшін хабарлассақ, телефон қоңырауларына жауап бермейді. Сот-медициналық сараптама қорытындысы шықты ма, іс бойынша басқа да мән-жайларды білу мүмкін болмай тұр. Сондықтан, кеше тергеушінің ісіне құқықтық баға беру және қылмыстық істі тергеу қандай сатыда тұрғаны туралы ақпарат алу үшін Бас прокуратураға шағым түсіруге мәжбүр болдым», – деді адвокат.