Ералы Тоғжанов: балалардың тұтыну себеті жеке қарастырылмайды

ҚР Премьер-Министрінің орынбасары Ералы Тоғжанов балалардың тұтыну себетін енгізу мүмкіндігі туралы түсінік берді, деп хабарлайды Orda.kz.  тілшісі.

Балаларға арнап жеке тұтыну себетін енгізу туралы депуттатық сауалға жауап берген вице-премьер бұл ұсынысты орындау қазірге  қарастырылмайтындығын айтты.

— Бір адамға шаққандағы ең төменгі ақшалай табысты анықтау үшін ең төменгі күнкөріс деңгейі қолданылады. Бұл адам өмірін қамтамасыз ету үшін қажетті азық-түлік өнімдерінің, тауарлар мен қызметтердің ең төменгі жиынтығы. Оның мөлшері балаларды қоса алғанда жан басына шаққанда және халықтың жыныстық-жас топтары бойынша есептеледі, - деді Ералы Тоғжанов.

Вице-премьердің  айтуынша, қазіргі ең төменгі күнкөріс деңгейінің азық-түлік қоржынына тәулігіне 2175 ккал энергетикалық құндылықты қамтамасыз ететін азық-түлік  өнімдерінің 43 атауы кіреді.

— Осыған байланысты, балалар тұтыну қоржынын жеке есептеуге әлі ерте деп санаймыз, - деді Ералы Тоғжанов.

Бұл тізім Тамақтану институтының ұсынымдарына және Дүниежүзілік азық-түлік ұйымы мен Дүниежүзілік денсаулық сақтау ұйымының тамақтану талаптарына сәйкес реттелген.