«Ер балаға тиіскен»: Алмас Кішкенбаев сотталды

Бұған дейін 11 сынып оқушысына жыныстық емеурін көрсетті деп айыпталған танымал әнші 39 жастағы Алмас Кішкенбаев 15 тәулікке қамалды, деп хабарлайды Orda.kz.

Алматы қаласының әкімшілік құқық бұзушылық істер жөніндегі мамандандырылған ауданаралық соты жабық түрде әншіге қатысты әкімшілік құқық бұзушылық туралы істі қарады.

«Сот Кішкенбаевтың мас кезінде осындай әрекетке барғанын анықтады.  Сотта К. оқиғаның мән-жайы есінде жоқ екенін түсіндірді. 434-баптың 1-бөлігінің санкциясы 20 АЕК мөлшерінде айыппұл салу немесе 5 күннен 15 тәулікке дейін әкімшілік қамауға алу түріндегі жауапкершілікті қарастырады. Жауаптылықты жеңілдететін мән-жайлар анықталған жоқ. Сонымен қатар, жауаптылықты ауырлататын мән-жай ретінде мас күйінде құқық бұзушылық жасағаны анықталды. Жоғарыда айтылғандар негізінде К.-ға ӘҚБтК-нің 434-бабының 1-бөлігінде көзделген әкімшілік құқық бұзушылық жасағаны үшін кінәлі деп танылып, оған 15 тәулікке қамауға алу жазасы тағайындалды», деп мәлімдеді Алматы қалалық сотының баспасөз қызметі. 

Еске сала кетсек, бұған дейін әнші курьер болып жұмыс істеп жүрген, кәмелеттік жасқа толмаған 11 сынып оқушысының жыныстық мүшесін ұстағаны үшін айыпталды. Жасөспірімнің әкесі қорқып үйге келген баласының жағдайын білген соң полицияға арыз жазған.