ЕО елдері соғыс уақытындағы экономикаға көшуді жоспарлап отыр

Украинаның артиллериялық снарядтарды жеткізу туралы өтінішінен кейін еуропалық қорғаныс өнеркәсібі «соғыс уақытындағы экономикаға» көшуді жоспарлап отыр.

Еуропалық ішкі нарық жөніндегі комиссар Тьерри Бретон Financial Times газетіне берген сұхбатында еуропалық қорғаныс өнеркәсібі «қорғаныс өндірісінің қажеттіліктерін қанағаттандыру үшін соғыс уақытындағы экономикаға өтуі керек» деді. Мұндай қорытындыны Еуропалық комиссар Украина Еуроодаққа ұрыс даласында табысқа жету үшін айына 250 мыңдай артиллериялық снаряд беруді өтінгеннен кейін жасады.

Британдық газет Украинаның қорғаныс министрі Алексей Резниковтың еуропалық әріптестеріне өтініші бар хатын жариялады. Басылым Украина орташа есеппен айына 155 мм калибрлі 110 мыңға жуық снаряд пайдаланады мәлімдеп, бұл ресейлік тарап пайдаланған снарядтар санының 25 пайызын құрайтынын нақтылайды.

«Егер біз қолда бар артиллериялық снарядтар санымен шектелмесек, біз айына 594 000 снарядты толық пайдалана алар едік» деп жазды Резников.

«Біздің бағалауымызша, жауынгерлік тапсырмаларды сәтті орындау үшін ең аз талап толық оқ-дәрілердің кемінде 60% немесе айына 356,4 мың снарядты құрайды» делінген украиндық ресми хатта.

Енді Еуропалық Одақтың алдында елдердің экономикасын жаңа деңгейге шығару мәселесі тұр. Басылымның жазуынша, қару-жарақ пен әскери техника өндірісін арттыруды қаржыландыру мәселесін Еуроодақ елдерінің басшылары наурыздың 23-24-і күндері Брюссельде өтетін саммитте талқылай алады.