Енді сталкердің сұрқия әрекеті заңмен жазаланады

Сталкинг үшін қылмыстық жауапкершілік енгізу жоспарланып жатыр,  жұмыс тобы бұл заң жобасын мақұлдаған, ендігі кезекте заң жобасы палатада екінші оқылымға шығарылады, деп хабарлайды Orda.kz.

Енді сталкинг ресми түрде қылмыстық құқық бұзушылық ретінде мойындалады. Депутаттар заң жобасына ереже енгізіп, ақпан айында қабылдауды жоспарлап жатыр. Адамды қуғын-сүргінге ұшыратқандарға енді айыппұл белгіленеді, нақты мөлшер әлі айтылмады.

Мәжіліс депутаты Абзал Құспанның айтуынша, заң жобасы аса ауыр қылмыстардың алдын алу мақсатында енгізілуде. Депутат қылмыстық кодекске жаңа нормалар енгізу кезінде құқық және сот тәжірибесін мұқият зерттеу қажеттігін атап өтті. 

 «Біз барлығын бірдей жауапкершілікке тартуды көздеп отырған жоқпыз. Айыппұл мөлшері туралы айту қиын, себебі пленарлық отырыста өзгерістер енгізілуі мүмкін», - деді Құспан.