Енді сотқа жеткен іс прокурорға "қайта тергеу" үшін қайтарылмайды  

Мәжіліс "ҚР кейбір заңнамалық актілеріне Қылмыстық, Қылмыстық-процестік және Қылмыстық-атқару кодекстерін оңтайландыру мәселелері бойынша өзгерістер мен толықтырулар енгізу туралы" заң жобасын бірінші оқылымда мақұлдады. 

Мәжіліс баспасөз қызметінің хабарлауынша, жоба президенттің 2022 жылғы 1 қыркүйектегі жолдауында берілген тапсырмасына сәйкес әзірленді.

"Құқық қорғау органдарына қылмыстық істің кем-кетігін жамап-жасқауға мүмкіндік берілмейді. Сот келген іске қатысты жинақталған материалдар, қылмыстық істің төңірегінде жиналған дәлелдемелері адамды кінәлі деп тануға жеткілікті ме, жоқ па деген сұраққа ғана жауап беруі қажет. Яғни, не соттауы не ақтауы керек" делінген хабарламада.