Енді оқушыларды қорлаған ұстаздарға айыппұл салынбақ

Қазақстанда оқушыларды қорлаған ұстаздар жауапқа тартылатын болады. Бұл туралы Оқу-ағарту вице-министрі Оспан Еділ мәлімдеді, деп хабарлайды Orda.kz порталы.

Министрден мұғалім мен оқушының арасындағы дауда агрессия ұстазда болса, не істейтіні сұралған болатын. Шенеуніктің сөзінше мұндай жағдайда мұғалімдерге 50 АЕК (184 600 теңге) көлемінде айыппұл салынады.

«Елімізде «Педагог мәртебесі туралы» заң қабылданып, онда әрбір ұстаздың міндеті мен жауапкершілігі нақты айқындалған. Педагогикалық әдеп нормаларын білу – олардың кәсіби шеберлігін, сондай-ақ еңбек тәртібін бағалау критерийлерінің бірі. Мұғалім әдебін бұзу тәртіптік әрекет, ол үшін тәртіптік жауапкершілік көзделген. Әкімшілік кодексте мұндай жауапкершілік қарастырылған. Мұғалімнің оқушыларға психологиялық немесе физикалық зиян келтіргені расталса, ол үшін 50 АЕК көлемінде айыппұл салынады», – деді Оспан Еділ.

Министр мұғалімдерге қатысты осындай шағымдардың жиі түсетінін айта кетті.

«Әрбір өтінішті білім сапасы жөніндегі комиссия мұқият қарайды. Әрбір жағдайда қызметтік тексеріс жүргізіліп, шара қабылданады. Қазір мұғалімдер конкурстық негізде жұмысқа қабылданады, онда комиссия нақты үміткерге мұғалім этикасын білетін не білмейтіні туралы сұрақ қояды», - деп қосты вице-министр.