Енді қоғамдық орындарда никабқа айыппұл салынады

Қырғызстанда қоғамдық орындарда никаб кигендерге 20 мың сом мөлшерінде айыппұл салынуы мүмкін, деп хабарлайды Orda.kz.

24 kg сайтының мәліметінше, бұл туралы Қырғызстан парламентінде талқыланып жатқан «Діни сенім бостандығы және діни бірлестіктер туралы» заң жобасында айтылған.

Әкімшілік құқық бұзушылықтар туралы кодекске 127.1-бап енгізілу ұсынылған. Бұл бап мемлекеттік органдар мен қоғамдық орындарда адамның жеке басын анықтауға мүмкіндік бермейтін киім киюді реттейді.

Депутат Дастан Бекешев бұл айыппұлдың азаматтар үшін ауыртпалық болатынын айтты.

«Никаб немесе паранжа киіп, бет-жүзін жасырғандарға 20 мың сом айыппұл салынады. Никабты көбінесе әлеуметтік тұрғыдан осал әйелдер киеді. Ал жоғары табысы мен білімі бар әйелдер арасында никаб кигендерді сирек көремін», — деп атап өтті депутат.

Бұған дейін дін істері жөніндегі мемлекеттік комиссия қоғамдық орындарда никаб киюге тыйым салатын норманы заң жобасынан алып тастау туралы ұсыныс білдірген болатын, ол бұл шешімнің демократия принциптеріне қайшы келетінін жеткізген еді.

«Бұл пікірлер ескерілмеді, себебі демократия принципі дауыс беруге қатысу құқығы, еркін дауыс беру және сайлауға кандидат ұсыну құқығын қамтиды. Бұл шектеу тек мемлекеттік органдар мен қоғамдық орындарда жеке басын анықтауға мүмкіндік бермейтін киімге қатысты», — деп жауап берді заң жобасының авторлары.

Парламентте діни саладағы заңнамалық актілерге өзгерістер енгізу туралы заң жобасы екінші оқылымда қаралады.