Енді алаяқтар «антикор төрағасы» атынан қоңырау шала бастады

Қазақстан Республикасы Сыбайлас жемқорлыққа қарсы іс-қимыл агенттігі алаяқтық фактілері туралы ескерту жасады, деп хабарлайды Orda.kz.       

«Қазіргі уақытта алаяқтық жағдайлары жиілеп кетті, енді алаяқтар өздерін «антикор төрағасы» ретінде таныстырып,  түрлі «мәселелерді шешуге» қатысты оның атынан қоңырау шала бастады»,  деп хабарлады агенттіктің баспасөз қызметі.

Мысалы, әлеуметтік желілерде қаскөй өзін Сыбайлас жемқорлыққа қарсы қызметтің төрағасы Асхат Жұмағали ретінде таныстырып, Жамбыл облысы әкімдігі білім басқармасының Жуалы ауданындағы мектептерінің бірінің директорына жеке мәселелерін заңсыз шешу мақсатында қоңырау шалған оқиға тіркелген.

Мәлімет бойынша, қазір қаскүнем анықталды, оған қатысты заңда көзделген шаралар қабылдануда.

«Осыған байланысты, алаяқтардың мессенджерлер мен әлеуметтік желілерде (WhatsApp, Telegram, Instagram, Facebook және т.б.) жалған аккаунт жасайтынын, сондай-ақ азаматтарды адастыру және алаяқтық жолмен пайда табу үшін агенттіктің басшылығы мен лауазымды адамдары ретінде телефон шалатынын еске саламыз» деп жазылған хабарламада. 

Азаматтардан мұндай алаяқтық қоңырауларға сенбеу, күмәнді сілтемелерге өтпеу, сондай-ақ ақша аудармау сұралды.