«Еңбекақыны жеу»: Қазақстандық кәсіпорындар қызметкерлерге 3,3 млрд теңге қарыз

3,3 млрд теңгеден астам жалақы бойынша қызметкерлерге қарыз болған 259 қазақстандық кәсіпорынды мемлекеттік еңбек инспекциясы анықтады.

Бұл туралы Orda.kz хабарлады.

Еңбек және әлеуметтік қорғау министрлігінің мәліметінше, 1 тамызда елімізде жұмыс берушілер қазақстандықтардың еңбек құқықтарын бұзған 5,6 мың жағдай анықталды.

Ең үлкен мәселе — 14,9 мың қызметкерге еңбекақы төлемей отырғаны болды. Жалақы уақтылы берілмейтін кәсіпорын басшыларына жалпы сомасы 34,6 млн теңгеден асатын 222 ұйғарым мен айыппұл жазылды. Мемлекеттік органдардың ескертпесінен кейін жұмыс берушілер 13,2 мыңнан астам қазақстандықтың жалақысы бойынша жалпы сомасы 2,6 млрд теңге қарыздарын өтеді.
1 тамызда мемлекеттік инспекция Қазақстанда азаматтардың құқықтарын қорғау бойынша 6,7 мыңнан астам заңбұзушылық анықтады.

Жұмыс берушілерге 2,5 мың ұйғарым жазылып, оларға жалпы сомасы 321,9 млн теңге болатын 2,9 мыңнан астам айыппұл салынды.