Емхана есепшілері 340 млн теңге жымқырған

Алматы қаласында емхана есепшілері қомақты қаржыны заңсыз құртып келген.

Алматы қаласы Медеу ауданының №2 аудандық сотында №30 қалалық емхананың бас есепшісі мен аурухананың есепшісіне қатысты, бөтен мүлікті аса ірі көлемде иемдену немесе ысырап ету туралы қылмыстық іс қаралды.

Бас бухгалтер мен есепші 2019 жылдың маусымнан 2023 жылдың қараша айына дейін жұмыс істемейтін адамдардың шоттарына жалақы мен үстемелерді есептеп ақша аударып келген.

Салдарынан мемлекетке жалпы сомасы –  340 млн теңге материалдық зиян келтірілді. 

Сотта сотталушылар өз кінәләрін толық мойындады. Сот үкімімен бас бухгалтер кінәлі деп танылып оған 7 жыл 6 ай бас бостандығынан айыру жазасы тағайындалды. Ал есепшіге 7 жылға бас бостандығынан айыру жазасы тағайындалды. Сондай-ақ олар енді 5 жылға дейін материалдық жауапкершілікке байланысты қызметпен айналысу құқығынан айырылды.