Елорданың коммуналдық қызметкерлері күшейтілген жұмыс кестесіне көшті

300-ге жуық адам көшелерді қардан тазалап, жаяу жүргіншілер жолын көктайғақтан тазартады. Коммуналдық қызметшілер тәулік бойы жұмыс істейтін болады.

Астана әкімдігі жаңа жыл күні қала тұрғындарының көшеде жүріп-тұруына қолайлы жағдай жасауға уәде беріп отыр. Синоптиктердің болжауынша, 31 желтоқсанда Астанада қар, бұрқасын, көктайғақ болады.

Сондықтан коммуналдық қызметкерлер тәулік бойы жұмыс істеуге көшті.

30 желтоқсан күні сағат 18:00-ден бастап түнгі ауысымда Астана көшелеріне 1000-нан астам арнайы техника мен 300-ге жуық жол қызметкері жұмысқа шықты. Елордадан қазірдің өзінде жүк көлігімен 60 мың рет қар шығарылды.