Елордалық көше атауы жазылған тақтайшадан қате тапты

Азамат көше атауы қазақ тілінде дұрыс жазылмағанына ашуланды. Көшесі сөзіндегі «ө» әрпінің орнына тақтайшада «о» әрпі тұр.

Бұл туралы Orda.kz хабарлады.

– Бұл суретті көріп, өзімді жаман сезіндім. Көше атауларын жазғаннан кейін тексеретін сарапшылар жоқ деп ойлаймын. Олар сауатсыз ба, деген сұрақ туындайды. Жалпы, қала әкімдігі қайда қарайды? Менің ойымша, тақтайшаны ілуге рұқсат берген әкімшілік жауапкершілікке тартылуы керек! Біздің мұғалімдер мұндай өрескел қателіктер үшін екі қояр еді.  Айтарға сөзім жоқ! – деп жазды Ерлік Серкеш Facebook-тегі «Астана, хочу похвалить, пожаловаться» тобында.

Нұр-Сұлтан қаласы әкімдігінің iKomek қызметі азаматтың өтініші тиісті органға жіберілді деп сендірді.

Бұл көше атауларында кездесетін бірінші өрескел қателік емес.