Елордалық досынан жарты миллион теңге ұрлап кеткен

Жедел-іздестіру іс-шараларын жүргізу кезінде полицейлер бұрын алаяқтық жасағаны үшін сотталған 30 жастағы Нұр-Сұлтан тұрғынын ұстады.

Бұл туралы Orda.kz елордалық полиция департаменті баспасөз қызметіне сілтеме жасап хабарлады.

Тергеу барысында күдікті досын сөйлесуге шақырып алған. Көлігіне отырып, миллион теңге қарызға сұраған. Зардап шегуші жанында ондай ақша жоқтығын айтып, көліктегі 500 мың теңгені қарызға алуды ұсынған.

Біраз уақыттан кейін танысы күдіктіні көлікте жалғыз қалдырып, дүкенге шығып кеткен. Мүмкіндікті пайдаланып, ол ақшаны қолды еткен.

Көлік иесі келген соң ер адам күдік туғызбай, әңгімені жалғастырған. Артынша ол 500 мың теңге қажет емес екенін айтып, танысымен қоштасып, көлігінен шығып кеткен.

Ақшаның ұрланғанын анықтаған зардап шегуші полицияға жүгінген. Полиция ұсталған ер адам қылмысты мойындады. Қылмыстық іс қозғалды, оның бұрын елордада жасалған осыған ұқсас қылмыстарға қатысы анықталуда деді.

Кейінірек полиция күдікті ұрланған ақшаны жеке қажеттіліктеріне жұмсағанын анықтады.