Елорда балабақшасында 2 жасар баланы ұрып-соққан

Әлеуметтік желілерде Нұр-Сұлтандағы жекеменшік балабақшаға барған сәбиді ұрып-соғып, тұншықтырған суреттер тарады.

Sputnik Қазақстан хабарлағандай, оқиғаның мән-жайын зардап шеккен екі жасар қыздың анасы айтып берді. Елорда жұртшылығы бұл оқиға туралы жергілікті парақшаларда таратқан.

2 қаңтарда қызын балабақшадан алып кеткен анасы баласының жарақатынан шошып кеткен.

«Қызым әлі екіге толмаған. 12 қаңтар күні мен баланы жекеменшік балабақшадан алып кеттім. Білегінде көгерген жерлерді, мойнындағы тұншықтырған іздерді көріп, шошып кеттім. Болған оқиғаны көргендер үндемейді» дейді Нұр-Сұлтан қаласының тұрғын Марина.

Оның айтуынша, сәбиінде оған дейін мұндай жарақат болмаған. Бірақ 10, 11 және 12 қаңтар күндері қызы бала бақшаға барғысы келмеген. Маринаның айтуынша, қызының тілі әлі шықпаған.

Әйелдің айтуынша, тәрбиешіге қатысты іс қозғалды. Бірақ бір аптадан кейін тергеуші оған медициналық сараптаманың нәтижелері әлі белгісіз екенін айтқан.

Қыздың анасы істің қозғалмайтынына алаңдап, қоғамнан көмек сұрады.

Полициядан мәлім еткендей, жәбірленушінің арызы бойынша қылмыстық іс қозғалған.

«Тергеу амалдары жүргізілуде. Бұл іс полиция департаменті басшылығының бақылауында» делінген таратылған түсініктемеде.